Anubhav Agrawal - Mindf**ked: When Its 4 a.m. and You Cant Stop Thinking (Hinglish edition)

OTHER BOOKS BY THE AUTHOR

Why Not Me? A Feeling of Millions

Contents

Introduction: Overthinking
Kya Hai?

S ubah ke 4 baj gaye, lekin yeh dimaag hai ki sochna band hi nahi kar raha hai. Jab dekho har waqt kuch na kuch sochta rehta hai. Khud ke baare mein sochna, kisi aur ke baare mein sochna, kisi cheez ke baare mein sochna, kisi jagah ke baare mein sochna, kuch hone wala hai toh uske baare mein sochna, ya kuch beet gaya hai toh uske baare mein sochna. Kabhi apni kamzoriyon ke baare mein sochna toh kabhi khud kuch banne ke baare mein sochna. Na jaane kitni aisi cheezein hoti hain jo aaye din humare dimaag mein chal rahi hoti hain.

Humara har cheez ke liye thoda bahut sochna toh thik hai, ek bahut normal si baat hai, lekin jab hum kisi cheez ke baare mein zaroorat se zyada sochna shuru kar dete hain, dikkat wahan se shuru hoti hai. Kyunki jab bhi hum kisi cheez ke baare mein overthinking kar rahe hote hain toh humari zindagi ka ek bahut aham hissa ek jagah par ruk jaata hai, aur bahut koshishein karne ke baad bhi hum us cheez ko, us overthinking ko rok nahi paate. Isi tarah se humara mindf**k ho jaata hai.

Mann ka ghabrana, sar mein dard ho jana, dil ki dhadkanein tez ho jaana, kisi cheez ko lekar tension lena, yeh sab tab hi hota hai jab hum overthinking kar rahe hote hain kisi cheez ke baare mein.

Sochte sochte hum kayi baar ek aisi jagah par chale jaate hain, jahan hum kabhi jana nahi chahte. Soch par kaabu paana, apne khayalo ko kaabu mein karna, ya overthinking karne se khud ko rokna, sach kahun toh na hi bahut zyada mushkil hota hai aur na hi asaan. Bas ek sahi guidance ki zaroorat hoti hai, kuch practices karni padti hain, jissey hum kaafi hadd tak overthinking ko rok sakte hain.

Thinking aur overthinking mein ek baal barabar fark hai, lekin woh fark hi pareshaani ki jad hai. Kyunki jab tak hum normally kuch soch rahe hain, tab tak sab sahi hai, koi pareshani nahi, bilkul tension-free rehte hain hum. Lekin jahan humne usi cheez ya kisi bhi cheez ko lekar zarurat se zyada sochna shuru kar diya, wahan se humari pareshaaniya badhni shuru ho jaati hain, aur ek bahut lambe arse tak chalti chali jaati hain.

Overthinking hum tabhi karte hain jab humein kisi cheez ki bahut fikar hoti hai, hum us cheez ke liye bahut serious hote hain, bhale hi woh kisi bhi wajah se ho, woh kisi bhi baare mein ho.

Par kabhi kabhi hum overthinking bewajah hi karne lagte hain, na koi baat na kuch masla, kisi bhi choti baat ko hum apne dimaag mein bahut bada bana lete hain aur us baare mein soch-soch ke hum itna pareshan ho jaate hain ki humein khud bura lagne lagta hai ki hum aise bewajah kyun soche ja rahe hain us baare mein.

Aksar hum overthinking un cheezon ke baare mein zyada karte hain jo exist bhi nahi karti, woh hum sirf dimaag mein bana lete hain. Asliyat mein woh ya toh hoti nahi hain, ya agar hoti bhi hain toh unke hone ki possibility bahut kam hoti hai. Hum apne dimag mein kisi cheez ko sochna shuru karte hain aur layers pe layers banate chale jaate hain, jissey ye process rukti nahi aur aakhir mein hum khud ko ek aisi situation mein paate hain jahan humein samajh bhi nahi aata ki hum pahuche kaise yaha tak, kyun pahuche, aur phir hum ussey bahar nikalna chahte hain.

Hum chahte nahi hain overthinking karna, par hum apne mann ko apne kabu mein nahi kar paate. Ek taraf hum pure mann se chah rahe hote hain ki hum us baare mein na sochein, toh doosri taraf hum us baare mein sochna chhod hi nahi paate. Aisa lagta hai jaise kuch negative thoughts humein jakad hi lete hain, aur chhodne ka naam hi nahi lete. Kuch baatein dimaag mein is kadar baithti hain ki uthte, baithte, sote, jaagte woh baatein hi chalti rehti hain.

Yeh overthinking agar ek hadd mein ho tab bhi ganeemat hai, lekin jab is overthinking ki hadein paar hone lagein toh humari mental health ke liye bahut zyada harmful ho jaata hai.

Overthinking karna sirf humari mental health ko affect nahi karta, balki humare mood ko bhi kharab karta hai, humare rishton mein bhi pareshaniya aane lagti hain, humari padhai-likhai mein bhi pareshani aane lagti hai, aur humari professional life mein bhi bahut zyada dikkatein aane lagti hain. Wajah? Wajah bas ek hi hai ki, overthinking karne ki wajah se humara mindf**k ho jaata hai aur hum apna focus kho dete hain.

Jab humein jahan pe dhyaan lagane ki zarurat hoti hai, hum wahan dhyaan laga nahi paate, aur uske alawa humare dimaag mein jo cheez chal rahi hoti hai, jisko leke hum overthinking kar rahe hote hain, humara saara dhyaan usi par rehta hai. Aur ye lack of presence humari pareshaniyo ko kam kabhi nahi karta, sirf or sirf badhata hai.

Jahan humara dhyaan hatna shuru hua, hum aage badhne ki jagah peeche hone lagte hain, ya agar peeche nahi bhi hue, tab bhi hum bas theher jaate hain. Waqt ke saath saath aage badhna bahut zaroori hota hai, yahi duniya ki reet hai. Agar iske khilaaf jaane ki koshish bhi karte hain toh hum har cheez mein fail hone lagte hain, zindagi ke har exam mein hum fail hone lagte hain, jo ki bilkul bhi theek nahi hai.

Jab bhi aapko aisa mehsoos ho ki aap overthinking kar rahe hain kisi bhi baare mein, toh aap sab se pehle apne mann ko shaant karo. Apne mann ko shaant karne ke liye aap yeh sab kar sakte hain:

• Apna dhyaan hatao, aur kahin aur lagao: Main janta hoon thoda mushkil hota hai, par shuruwaat toh kar hi sakte hain na. Kisi bhi cheez mein apna dhyaan lagane ki koshish karo. Kuch kar lo, jis cheez mein aap achhe ho, maahir ho, woh kar lo, koi bhi kaam jo pasand ho. Agar aap ek artist ho, jaise ki musician, painter, writer/poet, ya koi bhi art jo aapko pasand hai, usko kar ke aap apne mind ko distract kar sakte ho.
• Music suno: Koi bhi music jo thoda peaceful ho, woh suno. Music humare mann ko bahut zyada shaant karta hai aur humari problems se humein distract karne mein bhi help karta hai. Achcha relaxing music sun kar aksar insaan apni pareshaniyo ko kuch der tak bhool jaata hai, aur kho jaata hai. Aisa music Internet par available hai. Main khud apne mann ko shaant karne ke liye slow relaxation music sunta hoon, aap bhi try karna. Agar aap online calm music search karo, aapko kaafi achche options mil jayenge.
• Apne andar ki baaton ko bahar nikalo: Agar aap kisi bhi cheez ko lekar overthinking kar rahe ho toh aap kisi se share bhi kar sakte hokoi dost, partner, ya family mein koi jisse aapki achchi banti hai. Agar aapki life mein koi bhi nahi hai, aap khud ko akela mehsoos karte ho toh aap kahin par likh karjaise ki blog wagarahaap apne dil ki saari baatein express kar sakte ho.
• Zabardasti karne ki koshish mat karo: Aksar log apne saath zabardasti karne ki koshish karte hain, khud ko sochne se rokne ke liye bahut zyada zor dete hain apne dimaag par. Aisa karne se aapki overthinking rukti nahi balki aur bhi zyada trigger ho jaati hai. Ek lambi, gehri saans lekar apne mann ko shaant karo aur positive sochne ki koshish karo.
• Positive side ki taraf dhyan do: Duniya mein har cheez ke do pehlu hote hain, ek positive aur ek negative, tum negative toh apne aap sochte ho lekin positive sochne ke liye tumhein apne aapko wajah deni padti hai ki. Iss cheez ki doosri side bhi toh ho sakti hai. Ek situation ko positive side se dekhoge, khud ko samjhaoge toh apne aap overthinking kam ho jayegi.

Jab bhi koi chota bachha ro raha ho toh usey shaant karne ke liye aapko usey behlana padta hai, uska dhyaan kisi aur taraf le jana padta hai. Usi tarah jab aapko khud ko distract karna ho, toh apne aapko samjhana chahiye, doosri cheezon ko shuru karna chahiye, jis cheez mein interest ho woh karna shuru karo, aisi cheez karo jis mein aapka dimaag kharch ho, jis mein aapko us particular cheez ke baare mein sochna pade.